Surses-Danis/Tavansa 0:6 (0:4)

Siva 15 minutas vessigl tgunsch pudia esser 3:0 pigl CB Surses. Igl amprem gol digls giasts ò alloura rot igl culiez agl team da tgesa. Cun tutgier treis gedas la pitga on igls indigens er anc gia disfurtegna.

DA GION NUTEGN STGIER

Igl CBS sainza Giatgen Poltera, Gabriel Durisch, Linard Sonder, Dario Kolb,(absents, blessos u farmos).

Tgi igls Sursilvans èn sto pi ferms e giuia migler tgi igl CB Surses è nigna discussiun. Tgi l’equipa dalla Surselva seia pero stada considerabel miglra constat betg gist digltot. Tuttegna è la victorgia da Tavanasa ple tgi miritada. Igls Sursilvans on giuia fitg effiziaint e quasi fatg or da mintga schanza en gol. Tar igl CB Surses ò surtot disdetg la defeisa e la gronda part digl gi laschea igl goli Beat Wasescha aint igl stetg. Durant l’antiera parteida è betg reuschia agls defensours da s’accordar, da s’organisar e da giuier pi pondero. Ultra da chegl èn igls giuieders da mez er betg nias tar bleras ballas uscheia tgi igl resultat fò betg surstar. Tiers tot on alloura igls attatgeders er anc gia disfurtegna cun tutgier gist treis gedas la latta u la pitga.

Siva 16 minutas igl amprem gol

Bagnspert ò igl CB Surses tschartgea da far igl amprem gol, dantant er gia cletg tgi en schoz da Tavansa è ia angal per centimters siva siva igl gol. Giuia eran tschintg minutas tgi Beat Sonder ò tutgia la pitga. Er siva da chel on igls indigens fatg pressiun e gia anc dus ulteriouras pussebladads da far igl 1:0. Tant Beat Sonder scu Diego Demarmels on gia igl 1:0 sen igl pe. Fatg chel on persiva igls Sursilvans e chegl ainten la 16. minuta. Curt sessour è crudo igl 2:0 per Tavansa e chegl siva tgi la balla è eida dalla pitga sanestra aint igl gol.

Ulteriours gols tups

Igl terz gol da Tavanasa tgi Flurin Caduff ò fatg cun la testa è sto igl pi bel da tots. Marco chel ò el siva 25 minutas. Ainten la 33. minuta ò Richard Kloter cun en belezza schoz liber angal tutgia la pitga. Pacas secundas avant la fegn on igls hosps marco igl 4:0. Cun la sia parada ò Beat Wasescha tutgia exact la tgomma d’en attatgeder sursilvan e da chella è la balla eida aint igl gol. La sagonda mesadad ò scumanzo tot oter tgi bagn pigl CB Surses. Angal siva 50 secundas ò igl arbiter do en penalti per Tavansa. Cunter igl schoz bagn plazzo ò Beat Wasescha savia far sober navot. Tiers tgi igl CB Surses è betg ple sa catto tar igl gi fiss aglmanc igl gol d’onour sto ple tgi giustifitgia. Chel è dantant betg crudo, persiva ò l’equipa sursilvana anc fatg diesch minutas avant la fegn igl 6:0.