An direcziun relegaziun
Luso Coira – Surses 5:4 (1:1)
Ena minuta avant la fegn digl gi ò igl CB Surses fatg igl pari e 30 secundas avant tgi igl gi è sto fitto casso igl 5:4. Las portas per la 5. ligia èn sa davertas anc pi fitg siva da chella tarada.
DA GION NUTEGN STGIER
Plaz da ballape Vial, Domat, 60 fans.
CBS: Beat Wasescha, Philipp Berri, Giatgen Poltera, Fadri Demarmels, Sascha Janutin, Curdin Baltermia, Richard Kloter, Manuel Mareischen, Linard Sonder, Beat Sonder, Paulo Ildefonso.
Reserva: Riccardo Simonet, Diego Demarmels, Fabian Augustin, Dario Albertin.
Remartgas: a parteir dalla 68. minuta Diego Demarmels aint igl gol per Beat Wasescha tgi è sa blesso.
Per eventualmaintg tuttegna mitschier dalla relegaziun ainten la 5. ligia davigl pigl CB Surses navot oter tgi da gudagner cunter l’equipa portughesa. Cun ena victorgia orsoura cunter Luso Coira vess l’equipa da Surses fatg treis puncts e vess siva da chel gi gia diesch puncts sen igl conto. Cun perder ò igl CB Surses anc adegna angal set puncts u detg oter dus puncts daple tgi Sedrun. Igls Sursilvans on battia Trun/Rabius ed uscheia gudagnea la prova generala pigl grond gi da venderde seira cunter igl CB Surses. Per tottas dus equipas veigl dantant betg or bagn. Scu tgi la situaziun sa preschainta igl mument gioian Sedrun e pi tgunsch er igl CB Surses igl proxim campiunadi ainten la 5. ligia.
Dus gols da Beat Sonder
Exact tschintg minutas ògl duvro anfignen tgi Luso ò tratg igl amprem schoz sen igl gol digl CB Surses. Curt sessour è igl colp da testa da Paulo Ildefonso angal ia pac siva igl gol. Ainten la 16. minuta ò Beat Sonder fatg igl 1:0 siva d’ena belezza cumbinaziun cun Paulo Ildefonso e Linard Sonder. Igls Portughes on dalunga reagea e pac siva marco cun en super gol igl pari. Per bung 20 minutas è igl gi sto angulivo cun pitost miglras schanzas dall’equipa portughesa. Curt avant la pôssa ò Manuel Mareischen gia disfurtegna cugl sies schoz. Anc ena miglra pussebladad da far igl 2:1 ò pigl CB Surses pero gia Beat Sonder.
Anc set gols
48 minutas eran gio passadas cura tgi igls portughes on fatg igl 2:1. Angal curt siva ò Beat Sonder ratschet la balla da Richard Kloter e marco igl 2:2. Ainten la 59. minuta è Luso cun en colp da testa ia danovamaintg an avantatg. 11 minutas pi tard on igls Portughes perfign marco igl 4:2. Strousch tgi igl arbiter veva puspe do liber igl gi ò Richard Kloter fatg cun en penalti igl terz gol per la sia equipa. 60 secundas avant la fegn digl gi è reuschia a Curdin Baltermia da sagettar igl pari. Pero a chel gol è gist suando igl 5:4 per Luso, igl gol tgi è pi prubabel sto decisiv per la relegaziun digl CB Surses ainten la ligia pi bassa.