Surses-Valposchiavo1:3 (1:1)

 

Igls Poschiavins on gia treis schanzas concretas e gist nizigia chellas. Igl CB Surses dantant ò surtot ainten l’amprema mesadad mantganto da decider igl gi. Per 99% è la relegaziun realitad.

 

DA GION NUTEGN STGIER

 

Plazza d’Ava Tinizong, 50 fans.

 

CBS: Diego Demarmels, Philipp Berri, Fadri Demarmels, Giatgen Poltera, Sascha Janutin, Dario Albertin, Manuel Mareischen, Curdin Baltermia, Richard Kloter, Beat Sonder, Paulo Ildefonso.

 

Reserva: Fabian Augustin, Gabriel Durisch, Moreno Guetg, Linard Sonder. Blesso: Beat Wasescha.

 

Vess igl CB Surses giuia angal treis gis schi ferm e cun chella tenuta scu dumengia passada cunter Valposchiavo alloura fiss la relegaziun stada nign tema. Ossa dantant ò da succeder ena miracla tgi l’equipa ò betg da far igl zap ainten la ligia pi bassa. An mintga cass cunter igls Poschiavins ò igl CB Surses giuia egn digls miglers gis digl campiunadi. La victorgia da 3:0 cunter Sedrun ò fatg curasch agls giuieders e laschea sperar venavant chegl tgi pertotga la relegaziun. Cun ena victorgia cunter Valposchiavo vess igl CB Surses gia 13 puncts sen igl conto e las schanzas da tuttena mitschier dalla relegaziun fissan stadas bunas. Anc è pero decidia navot concret. Schi vess d’esser igl cass alloura dattigl navot oter tgi da scumanzar da nov, cun ena miglra tenuta e pigl giubileum da 30 onns digl CB Surses igl 2010 contanscher la promoziun ainten la 4. ligia. La staschung passada èn nias fatgs sbagls e da sperar è tgi tots chels tgi on da far ensatge cugl CB Surses vegian fatg l’experientscha duevla.

 

Siva 60 secundas gio 0:1

Strousch tgi igl gi ò scumanzo è la balla gio stada iant igl gol digl CB Surses. Perfign igls Poschiavins èn stos surstos digl sies gol d’avantatg. Tiers tgi igl goli digl CB Surses Diego Demarmels è betg igl pi pitschen, ò el gia nign stetg cunter chel schoz aint igl cantung sanester. Per 20 minutas è igl gi sto dètg angulivo e tant igls indigens scu er igls hosps on tutgia eneda angal la latta. Igl 1:1 tgi Richard Kloter ò fatg siva d’en belezza pass da Manuel Mareischen è sto ple tgi mirito. Igl gol tar igl pari ò procurp per ena veira euforia tar igl CB Surses ed anfignen alla fegn dallas ampremas 45 minutas ò igl team da tgesa gia igl suramang sen igl plaz. Schanzas da far ulteriours gols on surtot gia Richard Kloter, Paulo Ildefonso e Beat Sonder. Pacas secundas avant tgi igl arbiter ò tarmess las equipas ainten la pôssa ò en defensour da Valposchiavo spindro pigl sies goli la balla sen la lengia.

 

Penalti u betg penalti?

Giuia eran pacas minutas siva dalla pôssa tgi igl arbiter ò do en penalti cunter igl CB Surses. Schi igl faul da Fadri Demamels è veiramaintg sto degn per en penalti è sulet igla rbiter tgi so. Er siva digl 2:1 per Valposchiavao ò l’equipa da tgesa giuia pi ferm e siva 60 minutas vess igl pari antras Gabierl Durisch gia da crudar. Vers la fegn digl gi ò igl CB Surses augmento anc pi fitg igl tempo, giuia daple sur las alas e procuro tgi la defeisa da Valposchiavo ò betg adegna gia schi simpel. Mantgea on angal igls gols per igls indigens. Er Beat Sonder ò gia disfurtegna cugl sies schoz siva 80 minutas tgi vess gia dad esser igl 2:2. Persiva on igls hosps curt avant la fegn cun en conter ed en schinumno «Lobball» fatg igl 3:1.