Vers la fegn nias pi ferms
Surses-Luso Coira 1 :2 (0 :1)
Quatter taradas ègl do la davosa fegn d’emda per las equipas digl CB Surses. Er schi l’amprema equipa vess mirito en pari cunter Luso Coira, ò igl adversari betg angulo la victorgia.
DA GION NUTEGN STGIER
Plazza d’Ava, Tinizong, 40 fans.
CBS: Diego Demarmels, Philipp Berri, Giatgen Poltera, Fadri Demarmels, Dario Kolb, Curdin Baltermia, Manuel Mareischen, Richard Kloter, Riccardo Simonet, Damian Cadotsch, Paulo Ildefonso.
Reserva: Dario Albertin, Giatgen Mitgel Bellini, Remo Cereghetti, Gabriel Durisch, Beat Sonder, Mischa Wasescha.
Absents u blessos: Fabian Augustin, Sascha Janutin, Linard Sonder.
Igl gi digl CB Surses cunter l’equipa portugesa Luso Coira giaro betg ainten l’istorgia scu egna dallas parteidas da gronda tensiun. Igl è perfign da star stupia tgi a Tinizong èn crudos sonda passada treis gols. Dei ogl vasia or scu tgi dess ansomma nigns gols. Las ampremas 20 minutas on igls Portughes controllo igl gi uscheia tgi agl CB Surses è betg reuscheida ena acziun menziunabla. Els disturbavan gio bod igls attatgs digls indigens e la consequenza da chegl è tgi igl CB Surses è angal sto privlous cun colps libers u cun corners. Bung 30 minutas ins ò gia l’impressiun tgi tottas dus equipas viglian betg surpiglier igl suramang aint igl gi ed er giuier cun daple tgatsch. Persvadia veva anfignen alloura surtot la defeisa digl CB Surses. En unic sbagl ò procuro tgi Luso Coira ò fatg ainten la 32. minuta igl 1:0. Curt avant la fegn dallas ampremas 45 minutas ò Diego Demarmels evito cun dus paradas excellentas igl sieir 2:0 per igls Portughes.
Schanzas vessigl gia
Er siva dalla pôssa è igl nivo digl gi sto pitost mediocr. La miglra acziun è stada igl colp da testa da Fadri Demarmels tgi è ia angal pac sur igl gol. Diesch minutas sessour ò igl CB Surses gia cletg tar en colp liber da Luso Coira. Cun ena parada miraculousa ò Diego Demarmels musso tgi el è da gronda valeta pigl CB Sures. En ulteriour sbagl digls giuieders da mez è sto l’antschatta digl 2:0 per igls hosps. Cunter igl schoz bass aint igl cantung sanester ò igl goli digl CB Surses betg savia far bler . Tiers tot, sainza colpa è el daveiras betg tgi igls indigens on casso igl sagond gol. Siva da chel ò igl CB Surses giuia cun ple angaschamaint ed ainten la 70. minuta fatg cun en penalti igl 2:1. Beat Sonder è nia taro ainten la zona da castei e Damian Cadotsch ò tratg igl penalti. Pac siva ò igl attatgeder digl CB Surses gia disfurtegna cun tutgier angal la pitga. Schanzas da far igl pari on anc gia vers la fegn digl gi Mischa Wasescha, Beat Sonder e Richard Kloter cun en belezza colp liber. Luso Coira ò ple u manc transfurmo dus schanzas an gols e turno a tgesa cun treis puncts betg miritos.