Schi stō esser vogl

Surses-Valposchiavo 2:1 (0:0)

 

Ulteriour success pigl CB Surses. Siva d’ena buna sagonda mesadad ō l’equipa mirito la victorgia. Igl gol decisiv ō fatg Paulo Ildefonso.

 

DA GION NUTEGN STGIER

 

Cumparaglea cugl onn avant para igl CB Surses scu transfurmo. Turno č puspe igl plascheir da giuier, igl spiert da cumbat e surtot la viglia da leir gudagner. Scu para ō mintga singul giuieder vasia tgi dovra en angaschamaint cumplet per aveir sucess, tgi dovra la dretga tenuta e betg igl davos er la cretta tar sasez. Vasond igl CB Surses a giuier ins ō er l’impressiun tgi l’atmosfera ainten l’equipa seia er bler miglra tgi igl davos onn. Ultra da chegl č la morala siva da chella buna partenza aint igl campiunadi 2009/10 naturalmaintg ple tgi buna. Tiers tot chellas bunas premissas ō igl CB Surses tot oter tgi persvadia las ampremas 45 minutas cunter Valposchiavo. Chegl vala pero er pigl adversari tgi ō scu l’equipa indigena betg gia ena schanza concreta da far en gol avant la pôssa.

 

En ulteriour penalti

Antschet ō la sagonda mesadad betg gist schi bagn per igls Surmirans. Siva d’en pass sbaglea da Philipp Berri č en attatgeder da Valposchiavo marscho an direcziun digl gol digl CB Surses e fatg igl 1:0. Cunter chel schoz bagn plazzo ō Diego Demarmels, igl goli indigen savia far navot e mianc gia en stetg. Crudo č igl 1:0 per igls hosps siva 65 minutas. 120 secundas pi tard č Mischa Wasescha nia taro ainten la zona da castei ed igl arbiter ō dalunga do en penalti pigl CB Surses. Gio cunter Luso Coira veva Dario Kolb fatg en gol cun en penalti ed er sonda seira ō el puspe gia success. Igl 1:1 č sto ple tgi mirito. Chel gol ō fatg curasch all’equipa indigena tgi ō an en colp antschet a giuier belezza cumbinaziuns. Egna da chellas č stada la basa per far igl 2:1. Richard Kloter ō do en pass exact a Paulo Ildefonso e chel ō signia igl gol decisiv. Agl goli da Valposchiavo č resto navot oter tgi da piglier la balla or digl agen gol. Cun divers conters vess l’equipa indigena anc gia ulteriouras pussebladads da far igl 3:1. Sonda proxima gioia igl CB Surses allas 19.00 a Tinizong cunter Domat.