Surses-Domat 1:0 (0:0)

 

Terza victorgia pigl CB Surses. Diesch minutas avant la fegn ò Manuel Mareischen fatg igl gol dad ôr. Domat vess mirito en pari.

 

DA GION NUTEGN STGIER

 

Plazza d’Ava Tinizong, 40 fans.

 

CBS: Diego Demarmels, Philipp Berri, Giatgen Poltera, Fadri Demarmels, Sascha Janutin, Dario Kolb, Richard Kloter, Manuel Mareischen, Fabian Augustin, Mischa Wasescha, Gabriel Durisch.

 

Reserva: Beat Sonder, Riccardo Simonet, Dario Albertin, Remo Cereghetti.

 

Igl CBS sainza: Damian Cadotsch, Curdin Baltermia, Paulo Ildefonso, Giatgen Mitgel Bellini e Linard Sonder.

 

Scu igl CB Surses veva er Domat anfignen ossa gudagnea aint igl campiunadi actual dus gis, giuia en pari e pers egn. Tottas dus equipas vevan set puncts sen lour conto. Sen fundamaint da chella constellaziun era oramais procuro per tensiun. Aglmanc sen igl palpieri era Domat igl favorit, chegl er cun aveir pers igl CB Surses aint igl campiunadi 2008/09 gist tots dus gis cunter igl madem adversari. L’ediziun digl CB Surses da chest onn è danatant tot ensatge oter, uscheia tgi Urs Keller, igl trenader chintava cun ena victorgia cunter Domat.

 

Angal cun colps libers

En schoz da 25 m da Fabian Augustin è sto igl unic punct culminont dallas ampremas 20 minutas digl gi. Schiglio è betg succedia bler sen igl plaz, oter tgi igl arbiter ò repartia gist an seria cartas menlas. El ò interrot adegna puspe las acziuns e la consequenza è stada tgi tottas dus equipas sa cattavan simplamaintg betg tar igl gi. Las unicas schanzas tgi Domat ò gia da far igl gol d’avantatg èn stos treis colps libers. Ainten la 34. minuta ò Diego Demarmels evito cun ena belezza parada igl 1:0 per igls giasts. Pac siva ò Mischa Wasescha mantganto da far igl amprem gol pigl CB Surses. Varsaquantas minutas pi tard, ò Richard Kloter gia cugl sies schoz disfurtegna, igl qual vess sainz’oter er savia eir aint igl gol. Pacas secundas avant la pôssa ò igl arbiter do en ulteriour colp liber per Domat siva d’en faul da Giatgen Poltera. Angal per centimeters è igl schoz digl attatgeder da Domat ia sur igl gol digl CB Surses.

 

Dus gedas la pitga

La sagonda mesadad on tottas dus equipas giuia cun daple angaschamaint. Igl è nia cumbino pi bagn, giuia pass pi precis e tuttegna è crudo angal en gol. Giuia eran 50 minutas cura tgi Domat ò tutgia angal la pitga. Pac siva ò er Richard Kloter vasia scu tgi igl sies schoz è angal ia ainten la pitga. Cun Beat Sonder è nia daple tgatsch aint igl gi digl CB Surses ed igls indigens on mess igl adversari pi fitg sot squitsch. Tuttegna è Domat cun en conter sto pi manevel agl 1:0 tgi l’equipa da tgesa. Igl amprem ò Giatgen Poltera evito igl sieir 1:0 e secundas pi tard ò Dario Kolb spindro la balla sen la lengia. Tant igls giuieders da Domat, scu er igls fans digl CB Surses vevan gio vasia la balla aint igl gol. Persiva è igl 1:0 digl CB Surses tgi Manuel Mareischen ò fatg, sto ensatge pigl îgl. Igl amprem ò Giatgen Poltera sur l’ala sanestra do en pass precis a Beat Sonder. Chel è scapo an direcziun digl gol da Domat, vasia tgi Manuel Mareischen era liber e dalunga do la balla agl giuieder da mez. Chel ò concludia l’acziun cun en belezza schoz da 22 m e marco igl gol dad ôr pigl CB Surses.