Panadoz-Surses 3 :0 (1 :0)

Pigl CB Surses è Panadoz egn digls pi malangraztgevels adversaris. Chel fatg è sa verifitgia er sonda passada. Aglmanc ò l’equipa surmirana angal casso treis gols.

DA GION NUTEGN STGIER

Absents u blessos: Fabian Augustin, Curdin Baltermia, Damian Cadotsch, Paulo Ildefonso.

La premaveira passada era igl CB Surses turno a tgesa da Panadoz cun ena tastada da 6:0. Gist schi noscha è la tarada da sonda passada betg stada. E tuttegna, schi igls indigens vessan miro pi bagn, tutgia la balla e gia daple cletg, davigl per l’equipa dad Urs Keller en ulteriour debachel cunter Panadoz. Detg simpel igl CB Surses era simplamaintg mental betg pront siva tgi igl campiunadi è sto interrot per dus emdas. Surtot l’amprema mesadad è betg reuscheida agls Sursetters ena bela cumbinaziun. Mantgea ò surtot er en giuieder tgi ò procuro pigl duevel tgatsch e tgi vess purto las ballas dalla mesadad digl plaz ainten la zona da castei digl adversari. Panadoz dantant ò gia diversas schanzas e tuttegna fatg angal en gol. Crudo è chel siva 30 minutas cura tgi igls defensours digl CB Surses on laschea per en curt mument en attatagder da Pandoz bela sulet davant Diego Demarmels. Dus minutas avant tgi igl arbiter ò tarmess igls giuieders ainten la pôssa ò Richard Kloter mantgano da far igl pari. Pi prubabel vess igl gi siva digl pari piglia en oter decurs ainten la sagonda mesadad.

Ple tgatsch cun Linard Sonder

Strousch tgi las sagondas 45 minutas on scumanzo ins ò gia l’impressiun tgi igl CB Surses seia ossa segl post. Panadoz dantant ò venavant giuia pi ferm e surtot er cumbino pi bagn tgi igls giasts. Philipp Berri ò bagn gia disfurtegna cun en colp liber tgi è ia angal per pac sur igl gol. Cun conters èn igls indigens adegna stos privlous e diversas gedas ò Dario Kolb intervignia las acziuns. Sainza dubi è el sto igl migler giuieder digl CB Surses sen igl plaz. Surtot siva tgi Linard Sonder è nia aint igl gi è finalmaintg marscho daple tar igls Surmirans. Tiers tot ègl anfignen la 65. minuta betg reuschia agl CB Surses da marcar igl pari. Persiva è crudo igl 2:0 per Panadoz e chegl siva 68 minutas digl gi. Igl è betg gist sto egn digls pi bels gols u detg oter an tottas furmas en «tgutg» gol. Siva da chel ò igl CB Surses giuia pi concentro e tant MischaWasescha scu er Giatgen Mitgel Bellini vessan gia l’occasiun da far igl amprem gol per la sia equipa.

Spindro sen la lengia

Betg angal Panadoz ò gia schanzas da far en ulteriour gol cun l’egn u l’oter colp liber, dantant er igl CB Surses. Er tar chels colps mantgevan agls giuieders simplamaintg las ideias. Tschintg minutas avant la fegn digl gi vess gia da crudar gist dus gedas igl 3:0 pigl team da tgesa. Eneda è la balla eida angal per centimeters siva la pitga digl gol digl CB Surses. En corner è sto igl punct da partenza per la sagonda schanza tgi Panadoz ò betg nizigia. Manuel Mareischen era sen la lengia ed ò savia evitar igl sieir gol. Fatg chel ò Panadoz aint igl taimp supplementar pacas secundas avant la fegn digl gi. Cunter igl colp liber da 22 m ò Diego Demarmels savia far veiramaintg navot. En belezza colp tgi ò anc mess igl punct sen igl «i» pigl adversari da tema digl CB Surses.