Tot oter tgi ena spassageda
Surses-Gelb Schwarz 2 :0 (1 :0)
Treis gedas ò igl CB Surses tutgia angal la pitga. Crudos èn igls dus gols alla fegn dall’amprema mesadad e pacas minutas avant tgi igl gi è sto a fegn. Sur anviern resta igl club surmiran alla testa dalla tabella.
DA GION NUTEGN STGIER
Plazza d’Ava Tinizong, 50 fans.
CBS: Diego Demarmels, Philipp Berri, Dario Kolb, Giatgen Poltera, Fadri Demarmels, Linard Sonder, Helder Gonzales, Sascha Janutin, Manuel Mareischen, Mischa Wasescha, Beat Sonder.
Reserva: Fabian Augustin, Dario Albertin, Giatgen Mitgel Bellini, Damian Cadotsch, Remo Cereghetti, Daniel Gonzales, Riccardo Simonet.
Absents u blessos: Curdin Baltermia, Paulo Ildefonso, Richard Kloter.
Eneda daple è sa musso tgi igl CB Surses ò simplamaintg fadeia cunter equipas tgi èn aglmanc sen igl palpieri pi deblas. Betg tgi igls Sursetters vessan fatg l’impressiun da perder chel gi, an ena maniera u l’otra ò mantgea igl dretg tgatsch. Dei ò igl team er fatg l’impressiun dad esser ensascu blocco, chegl er cun esser igl adversari permanent sen igls caltgogns.Tgi Gelb Schwarz so esser sainza dubi en adversari malangraztgevel ò dumengia passada er s’accurschia Schlarigna. Alla fegn digl gi on igls Engiadines gia dad esser cuntaints cugl pari dad 1:1. Er a Tinizong è igl gi en lung taimp sto fitg angulivo. Igls hosps on surtot defensiv fatg ena buna impressiun, dantant tgi agls attatgeders è betg reuschia da far bler.
30 secundas avant la pôssa
Igl CB Surses ò giuia ainten l’amprema mesadad bler mengia pac sur las alas. Cugl adversari disturbar gio bod mintga offensiva digls indigens on er tar chels mantgea las schanzas. Gelb Schwarz ò interrot adegna puspe mintga acziun digl CB Surses, tgi niva simplamaintg betg da surpiglier igl suramang sen igl plaz. Mantgano igl 1:0 per igls indigens ò ainten la 20. minuta Mischa Wasescha cun en bel colp da testa. Diesch minutas pi tard ò igl madem giuieder concludia ena acziun cun Manuel Mareischen cun en ulteriour colp da testa. En belezza schoz da Giatgen Poltera siva 30 minutas vess tgunsch pudia esser igl gol d’avantatg pigl CB Surses. Tschintg minutas avant la pôssa ò Gelb Schwarz perfign tutgia angal la pitga e chegl siva dad en conter. 30 secundas avant tgi igl arbiter ò termino l’amprema mesadad ò Helder Gonzales fatg igl 1:0. Igl Portughes ò profito dad en grond sbagl digl goli dall’equipa da Coira e gia nigna fadeia da marcar igl gol d’avantatg pigl CB Surses.
La miglra defeisa
Pigl CB Surses davigl navot oter tgi da giuier venavant offensiv e marcar schi spert scu pussebel igl sagond gol. Tgi igl far gols è betg ena fermezza digl magnatabella è nign misteri, avend igl CB Surses marco anfignen ossa «angal» 16 gols. Gelb Schwarz e Valposchiavo tgi èn davos ainten la tabella èn igls dus unics clubs tgi on marco pi pacs gols tgi igl CB Surses. Persiva ò l’equipa dad Urs Keller la miglra defeisa. Chella ò casso an diesch gis angal otg gols.
Cumbinaziun digls dus frars
Ainten la 50 minuta ò Daneil Gonzales mantganto cun en colp da testa da far igl 2:0 pigl CB Surses. Pac sessour ò igl sies frar Helder Gonzales tutgia cun en belezza schoz angal la pitga. Ossa on igls indigens augmento igl tempo ed er gia daples schanzas da far igl sagond gol. En schoz da 25 m da Sascha Janutin è bagn sto ensatge pigl îgl, dantant cun nigna consequenza sen igl resultat. Er el ò tutgia angal la pitga. 74 minutas eran gio passadas cura tgi Helder Gonzales ò tutgia per la sagonda geda angal la pitga. Igl gi pareva da piglier nigna fegn ed igls giuieders digl CB Surses faschevan l’impressiun dad esser nervous. Treis minutas avant la fegn ò l’equipa indigena gia cletg tgi en colp da testa da Gelb Schwarz è ia per pac sur igl gol. Curt avant tgi la parteida è stada a fegn ò Daniel Gonzales conlcudia ena cumbinaziun cun sies frar Helder Gonzales cugl 2:0.