Daveiras en cumbat d’amprema classa

 

Graztga alla buna prestaziun collectiva gudogna igl CB Surses igl gi cunter Domat. Grond maret per la victorgia ò surtot gia igl goli Diego Demarmels. L’aventura promoziun cuntinuescha e vo planget ainten la fasa finala. Treis victorgias ègl er do per igls juniors digl CB Surses.

 

DA GION NUTEGN STGIER

 

Plaz da ballape Vial, 100 fans.

 

CBS: Diego Demarmels, Curdin Baltermia, Dario Kolb, Fadri Demarmels, Dario Albertin, Helder Gonzales, Sascha Janutin, Linard Sonder, Manuel Mareischen, Daniel Gonzales, Mischa Wasescha.

 

Reserva: Philipp Berri, Gabriel Durisch, Paulo Ildefonso, Remo Cereghetti.

 

Absents: Richard Kloter, Beat Sonder, (blessos), Giatgen Poltera, (farmo), Fabian Augustin, (absent).

 

Igl gi tranter Domat e Surses ò daveiras cumpiglia tot chegl tgi totga tar en cumbat da dus teams tg’èn alla testa dalla tabella. Giuia on tottas dus equipas cun grond angaschamaint, per en gi dalla 4. ligia cun bler tempo e surtot cun acziuns plagn tensiun. Vurdo sur 90 minutas è igl adversari sto pi manevel agl 1:1 tgi igl CB Surses agl 2:0. An ena fasa da pressiun da Domat è reuschia a Paulo Ildefonso da marcar cun en conter igl gol decisiv, curt avant la fegn dalla parteida. Per tgi l’aventura promoziun ainten la 3. Ligia cuntinuescha dattigl pigl CB Surses navot oter tgi da gudagner igls dus proxims gis a tgesa cunter Panadoz e Schlarigna, tgi totgan aglmanc segl palpieri tar las fermas equipas.

 

Cun en nov libero

Fatg surstar ò Urs Keller, igl treander digl CB Surses cun lascher giuier Curdin Baltermia libero, an pe da Philipp Berri. Ena varianta tg’è sa cumprovada, sainza crititgier las prestaziuns digl defensour da Casti, tg’è anc adegna ena gronda pitga pigl CB Surses. Bagnspert ò igl CB Surses surpiglia igl suramang sen igl plaz e Helder Gonzales ò siva treis minutas mantganto da far igl amprem gol digl gi. Fatg chel ò igl capoattatgeder digl CB Surses alloura ainten la 7. minuta. Igl portughes ò concluida ena bel’acziun cun Manuel Mareischen cugl 1:0. Las proximas 15 minutas ò Domat domino e mess igls hosps sot pressiun. Eneda daple è sa musso tgi la defeisa digl CB Surses ò betg per navot casso anfignen oz angal 14 gols. A parteir dalla 20. minuta èn igls Surmirans puspe sa cattos tar igl gi e la miglra pussebladad da far igl 2:0 ò gia siva 27 minutas Helder Gonzales. Vers la fegn dall’amprema mesadad ò puspe Domat gia bler daple digl gi e mantganto cun dus bunas schanzas da marcar aglmanc igl pari, schi betg igl gol d’avantatg. Crudo an îgl è tgi tscherts muments pareva l’antiera squadra digl CB Surses scu bloccada u betg preschainta. Chegl an spezial las davosas diesch minutas avant la pôssa.

 

Bunas paradas da Diego Demarmels

Siva dalla pôssa ò Domat augmento igl tempo, giuia cun daple tgatsch e mantganto da marcar igl pari mirito. Giuia eran 52 minutas cura tgi Mischa Wasescha ò angal per pac betg tutgia igl gol e betg fatg igl sagond gol pigl CB Surses. Stos aint igl center dalla sagonda mesadad digl gi èn igls dus golis, tg’on contribuia bler tgi igls aspectatours on betg vasia daples gols. Daniel Gonzales ò ainten la 60. minuta gia ena gronda schanza da far igl 2:0 per igls hosps. Curt siva ò Manuel Mareischen testifitga cun en excellent schoz, tg‘el è betg angal en bung reschissour sen igl plaz, dantant er en ferm attatgeder. Fatg fegn agl semi digls indigens da tuttegna far igl pari las davosas diesch minutas digl gi ò Diego Demarmels, igl goli digl CB Surses. Dus gedas ò el cun intervigneir cun success evito igl sieir 1:1. Strousch tgi Gabriel Durisch è sto sen igl plaz ò el do en pass a Paulo Ildefonso e chel ò ainten la 88. minuta fatg cun en conter igl 2:0 tar igl resultat final.