En gol pi bel tgi l’oter

La buna prestaziun ainten l’amprema mesadad ò tanschia agl CB Surses per batter l’equipa portughesa. Tiers tgi igls fans on betg vasia en grond gi èn els stos cuntaints tgi igls indigens on siva da dus taradas puspe banduno igl plaz scu victours.

DA GION NUTEGN STGIER

Plazza d’Ava Tinizong, 70 fans.

Igl CBS sainza: Fadri Demarmels e Helder Gonzales, tots dus farmos. Linard Sonder e Giatgen Mitgel Bellini absents.

Er aint igl gi dalla sagonda runda è betg reuschia a Lusitanos Samedan da far en gol cunter igl CB Surses. Igl aton passo veva l‘equipa surmirana gist gudagnea an Nagiadegna cun 4:0. Er sonda passada ò igl team d’Urs Keller betg eneda fatg l’impressiun da perder igl gi cunter igls Portughes. L’equipa è sa preschentada da buna luna e surtot cun la viglia da leir gudagner. Bagnspert on igls indigens vasia tgi chel adversari è da batter e far ensatge per la bilantscha digls gols.

Annulo en gol

Tuttegna ogl duvro radond set minutas anfignen tgi igl CB Surses è nia tar l’amprema buna schanza. Daniel Gonzales ò mantganto da far igl 1:0 siva d’ena belezza cumbinaziun da Fabian Augustin e Manuel Mareischen. Siva 24 minutas ò Dario Kolb tratg en colp liber fenomenal da 25 m e gia disfurtegna tgi igl schoz è ia angal per pac sur igl gol. Curt siva ò Sascha Janutin gia igl 1:0 sen igl pe e mantganto da far igl gol d’avantatg pigl CB Surses. Agls giasts è strousch reuscheida angal ena buna acziun ainten las ampremas 30 minutas digl gi. I geva gio vers la fegn dall’amprema mesdad cura tgi Fabina Augustin ò marco cun en colp da testa igl 1:0 per igls indigens. Pi bel, vess igl gio dadei mirito gol pigl CB Surses, betg savia esser. Angal dus minutas pi tard ò Sascha Janutin do en pass precis a Mischa Wasescha e chel ò cun en belezza schoz battia per la sagonda geda igl goli portughes. Secundas avant la fegn dallas ampremas 45 minutas ò el anc fatg en ulteriour gol. Igl arbiter ò dantant betg do igl gol, cun aveir vasia an dretg Mischa Wasescha ordvart posiziun.

Betg marco en penalti

Siva dalla pôssa pareva igl CB Surses betg ple schi da buna luna e mantgea on surtot las belas cumbinaziuns. Ainten la 57. minuta ò igl goli portugehs taro ingist Daniel Gonzales ainten la zona da castei. Dalunga ò igl arbiter musso sen igl punct da penalti e tarmess igl goli da Lusitanos sot la duscha. Cun aveir nign goli da reserva è en oter giuieder ia aint igl gol e gist fatg surstar tots, cun tigneir igl penalti. Tratg igl penalti tot oter tgi bagn ò Daniel Gonzales. Curt siva è en schoz da Giatgen Poltera angal ia per centimeters siva la pitga ve. Beat Sonder vess gist dus gedas gia la pussebladad da far igl 3:0, siva 60 minutas digl gi. Fatg chel ò alloura ainten la 73. minuta Paulo Ildefonso siva d’aveir ratschet la balla da Gabriel Durisch. Igl davos quart d’oura digl gi è betg ple succedia bler, tiers tgi igls indigens vessan forsa savia far daple per migliurar la bilantscha digls gols.