Surses-Tavo 2:2 (1:1)

Per tgi igl CB Surses contanscha tuttegnan anc la promoziun ogl da dar ena miracla. L’equipa surmirana ò betg profito digl pari da Schlarigna cun sez far angal en punct cunter Tavo.

DA GION NUTEGN STGIER

Aint igl gi da sonda passada èn s’inscuntros dus teams tgi on chest onn muteiv da far festa. Igl FC Tavo ò festivo cugl «Musikantenstadl» igl giubileum da 100 onns ed igl CB Surses fò an diesch deis festa pigl giubileum da 30 onns. Per l’equipa d’Urs Keller davigl navot oter tgi da batter Tavo. Chel club veva dantant betg gist fatg en sarvetsch agl CB Surses cun renunztgier agl gi cunter Schlarigna. Igl è donn tgi la Federaziun da ballape dalla Svizra orientala OFV ò an chella tgossa betg miglras leschas. Tar igl CB Surses e tar Schlarigna gevigl tuttegna anc per la promoziun ainten la 3. ligia e cun renunztgier Tavo agl gi cunter igls Engiadines èn chels nias tar treis puncts sainza far navot. Fiss sto igl cass tgi Schlarigna vess pers cunter Tavo nivigl tuttegnan anc tar ena «finalissima» er ainten la 4. ligia tranter igl CB Sures e Schlarigna.

En gol da 25 m

An mintga cass igl FC Tavo veva an nigna moda e maniera gl’intent da far regals agl CB Surses. Chella impressiun ins ogl aglmanc gia gio tar igl amprem contat dalla balla digls giasts. Tuttegna ò igl CB Surses scumanzo migler igl gi e tant Paulo Ildefonso scu er Helder Gonazles on gia bagndalunga la schanza da marcar igl 1:0 per igls indigens. Tottas dus equipas on betg nizigia igl colps libers e transfurmo chels an gols. Siva 30 minutas dall’amprema mesadad è en schoz da Sascha Janutin ia angal per pac sur la latta. Quatter miuntas sessour on igls defensours digl CB Surses cartia tgi igl arbiter tschivla la posiziun d’ordvart digl attatgeder da Tavo, chegl tgi è pero betg sto igl cass. Sainza nigna resistenza ò chel pudia far igl 1:0. Strousch tgi igl gi ò cuntinuo è reuschia a Helder Gonazels da far igl 1:1. Daveiras en schoz da 25 m, tgi gartegia agl Portughes betg gist tar mintga gi.

Betg defendia igl 2:1

Er siva dalla pôssa ò igl CB Surses betg giuia scu en club tgi vess anc l’occasiun da far igl zap ainten la 3. ligia. Tiers tot è l’equipa ainten la 55. minuta eida an avantatg cun 2:1 graztga agl penalti digl capocanunier Helder Gonzales. Per decider igl gi vess igl CB Surses gia da far igl terz gol. An spezial Paulo Ildefonso ò mantganto gist dus gedas da far chegl. Persiva ò Tavo marco diesch minutas avant la fegn igl 2:2. chegl siva d’en sbagl digl goli Diego Demarmels. Igl CB Surses e Schlarigna on ossa tots dus 39 puncts. Igls Engiadines pero on anc da giuier cunter Gelb Schwarz e tgi els perdan chel gi è strousch ensatgi tgi crei. Vess chegl tuttegna d’esser igl cass schi fò igl club cun igls pi pacs casteis igl zap ainten la ligia pi ota e chegl è igl mument igl CB Surses.