Spielbericht vom 28.05.07 (Rumantsch Edition)
Valposchiavo Calcio - CB Surses 1:1 (1:0)
Campiuns digls paris!
Terz pari en suite pigl CB Surses. Schanzas da far daples gols vessan igls Surmirans gia glindesde passo a Poschiavo. Vurdo sur 90 minutas digl gi è igl remis ple tgi giustifitgia. Persvadia ò surtot igl goli digl CB Surses.
Plaz da ballape Cortini, 40 fans, plievgia durant igl antier gi.
CBS: Flavio Sterli, Philipp Berri, Roland Wasescha, (46. min.) Roberto Guetg), Giatgen Poltera, Moreno Guetg, Manuel Mareischen, (58. min. Fabian Augustin), Richard Kloter, Damian Cadotsch, Paulo Ildefonso, Linard Sonder, 46. min. Beat Sonder).
Igl CBS sainza Remi Trenkwalder e Dario Kob, tots dus farmos.
Cun ena victorgia cunter Valposchiavo vess igl CB Surses d’ena vart savia sa distanztger da Panadoz igl davos dalla tabella e pi prubabel er gia ena tscherta siertad da betg stueir far eventual igl zap ainten la ligia pi bassa. La relegaziun è pero nign tema ed ainten igls proxims quatter gis vot igl CB Surses anc far ulteriours puncts. Tranter oter gioia l’equipa da Romeo Giovanoli er anc cunter Panadoz e chegl gist igl davos gi digl campiunadi. Visada è pero l’equipa ed er pertscherta tgi per contanscher la relegaziun dovrigl blera disfurtegna.
Fadeia cugl plaz pitschen
En ulteriour muteiv da turnar sur igl Bernina cun treis puncts era er tgi igl CB Surses leva la revanscha cun aveir pers a Tinizong gist 4:1 cunter l’equipa dalla val digl sid. Igls indigens on pero dalunga fatg pressiun e surpiglia igl commando sen igl plaz. La defeisa digl CB Surses ò surtot gia fadeia cun igls attatgeders svelts tgi survagnivan ena balla sen l’otra digls giuieders da mez e digls defensours. Igl team da tgesa sa cattava bagn sen igl plaz pitschen, dantant tgi igls Surmirans on gi fadeia da s’adattar a chella situaziun. Giuia eran tschintg minutas cura tgi Valposchiavo ò marco igl 1:0. En attatgeder è scapo dalla vart dretga, tratg en schoz bass da 22 m ed exact tutgia igl cantung sanester digl gol. Da chels gols ins ò betg vasia schi blers aint igl campiunadi actual dalla 4. ligia. Igl gol d’avantatg ò motivo igls Poschiavigns anc daple ed igl CB Surses ò catto nign recept da frenar l’offensiva digls indigens. Per part ò l’equipa da tgesa giuia attractiv, cun tempo e surtot sagetto or da tot igls cantungs. Igl CB Surses dantant ò strousch gia ena schanza concreta, cun excepziun d’en schoz da Richard Koter e da Damian Cadotsch. Cun daple furtegna vessan igls Poschiavigns tgunsch savia eir ainten la pôssa cugl resultat da 3:0.
Excellenta sagonda mesadad
Las sagondas 45 minutas in ò gia l’impressiun tgi dus equipas d’ena ligia pi ota seian sen igl plaz. Cugl intent da volver igl gi pareva igl CB Surses scu transfurmo e gia cun chella tenuta success. Ainten la 47avla minuta ò Richard Kloter sagetto igl 1:1 siva digl bel pass da Manuel Mareischen. Ainfra las proximas diesch minutas ò Damain Cadotsch gia aglmanc treis schanzas da 100% e betg tutgia eneda igl gol. Valposchiavo è pero sto venavant privlous, surtot cun conters. Tiers chegl on igls indigens tutgia anc dus gedas la pitga. Flavio Sterli igl goli digl CB Surses ò diversas gedas gia ena bunga reacziun ed evito ulteriours gols. Pac avant la fegn digl gi vess Damian Cadotsch gia la pussebladad da marcar igl gol «dad ôr» e cun chel er igls treis puncts budgetos.
DA GION NUTEGN STGIER