CB Surses - US Schluein 1:4 (0:2)

Cun Schluein ò igl CB Surses ratschet dumengia passada igl favorit nr. 1 dalla sia gruppa. Igls Sursilvans èn alloura er stos an tots gros miglers tgi igls indigens. Anc sa cattan igls giuieders betg schi bagn cugl nov sistem da gi sainza libero.

DA GION NUTEGN STGIER

 

Plazza d’Ava Tinizong, 80 fans.

CBS: Dino Augustin, Philipp Berri, Giatgen Poltera, Moreno Guetg, Sascha Janutin, Curdin Baltermia, Fabian Augustin, Richard Kloter, Linard Sonder, Beat Sonder, Diego Demarmels.

Reserva: Fadri Demarmels, Riccardo Simonet, Alexander Cadotsch, Dario Kolb, Manuel Mareischen. Da nov dastga en trenader midar or ples gedas en giuieder. Vot deir tgi en giuieder sorta curt avant la pôssa e turna per exaimpel curt avant la fegn digl gi sen igl plaz. 

Remartgas: Igl CBS sainza Flavio Sterli e Paulo Ildefonso. Sponsor dalla balla «Barterre», Savognin.

Igl CB Surses era viso dalla fermezza digl adversari. Cun Schluein ò l’equipa dad Urs Keller ratschet nign oter tgi igl club sursilvan tgi ò gia da far da premaveira igl zap dalla 3. ligia ainten la 4. ligia. Ultra da chegl totgan igls Sursilvans tar igls pi gronds favorits dallas 11 equipas. Las ampremas diesch minutas è betg succedia schi bler sen igl plaz. Igls hosps on bagn gia daple digl gi, dantant tgi agl CB Surses è strousch reuschia da rivar ainten la zona da castei digl adversari. Igls Sursilvans on alloura augmento igl tempo e giuia daple sur las alas. Or d’en attatg sur l’ala dretga è alloura er crudo igl 1:0 per Schluein antras Jan Berri. Tar chel gol ò la defeisa digl CB Surses per l’amprema geda betg gist fatg la miglra impressiun. Curt siva digl gol d’avanatg per igls indigens ò Sascha Janutin gia en buna schanza da marcar igl pari. Siva 30 minutas ò igl adversari gia disfurtegna cun tutgier angal la latta. Angal dus minutas pi tard ò Sandro Derungs concludia ena bela acziun cugl 2:0 per l’equipa sursilvana. Ed er tar chel gol è la defeisa digls indigens betg stada sen igl post. Da nov gioia igl CB Surses sainza libero, persiva cun quatter defensours sen ena lengia. Anc funcziunga chel sistem betg e scu tgi igls igls dus davos gis  on musso (igl CBS ò casso 9 gols) dovrigl anc divers trenadis anfignen tgi chel sistem porta igls amprems fretgs. Schluein vess gia la pussebladad da marcar anc ulteriours gols ainten las ampremas 45 minutas.

En gol communabel

Siva dalla pôssa ò Schluein giuia anc en pi attractiv ballape ed igl CB Surses ò gia nign stetg. Igls Sursilvans on giuia belas cumbinaziuns e musso tgi els totgan tar igls pi ferms dalla gruppa.   Ainfra treis minutas on els anc marco dus gols. Igl 3:0 è crudo siva 62 minutas e fatg chel ò Mattias Menzli. Igl 4:0 ò fatg Ramon Derungs siva d’en bel solo. Igl gol d’onour pigl CB Surses è sto ena acziun communabla da Fadri Demarmels e Beat Sonder. Chel gol curt avant la fegn è sto navot oter tgi cosmetica digl resultat.

Matchballsponsor