CB Surses - FC Bonaduz 0:4

Terza tarada en suite pigl CB Surses e betg anc en punct sen igl conto. Chegl è la maira bilantscha siva digls treis gis da tgesa. Dantant tgi tar igls trenadis funcziunga tot stupent, paran igls giuieders d’esser bloccos cura tgi vo per puncts. Dumengia proxima gioia igl CB Surses orsoura cunter igl magnatabella.

DA GION NUTEGN STGIER

Plaz da ballape Tinizong, 90 fans.

CBS: Flavio Sterli, Philipp Berri, Fadri Demarmels, Giatgen Poltera, Dario Kolb, Curdin Baltermia, Linard Sonder, Richard Kloter, Manuel Mareischen, Diego Demarmels, Beat Sonder.

Reserva: Sascha Janutin, Moreno Guetg, Riccardo Simonet, Alexander Cadotsch, Dino Augustin.

Igl CB Surses sainza Fabian Augustin e Paulo Ildefonso.

Sponsor dalla balla: hotel Cube

 

Schi schlet scu chest onn ò igl CB Surses darar scumanzo igl campiunadi. Er siva la terza parteida ò l’equipa dad Urs Keller betg anc fatg en punct. Remartgabel è er tgi igl CB Surses ò casso an treis gis gist 13 gols. D’attribueir chella bilantscha negativa è agl sistem da gi sainza libero tgi l’equipa dominescha betg anc. La defeisa ò er fatg cunter Panadoz ena impressiun malsieira e la consequenza da chegl èn stos igl quatter gols tgi Panadoz ò fatg dumengia passada. Pero er da mez mantga en reschissour e l’absenza da Remi Trenkwalder sa fò valeir er anc siva igl terz gi. Ultra da chegl mantga agl CB Surses en schinumo «capocanonier», en attatgeder da sang freid tgi nizegia mintga sbagl dalla defeisa digl adversari.

 

An set minutas dus gols.

Positiv è dantant tgi l’equipa lascha betg crudar las alas, mossa la viglia duevla e sa dat totta fadeia da sa cattar tar igl gi. Scumanzo ò la parteida cunter Panadoz tot oter tgi bagn. Gio siva dus minutas on igls giasts fatg igl 1:0 siva d’en colp liber. Giatgen Poltera veva fatg en faul ed igl arbiter ò dalunga do igl colp liber. Flavio Sterli ò fatg ena bela parada, ma en attatgeder da Panadoz è sto pi svelt tgi igls defensours digl CB Surses ed ò fatg igl gol. Angal tschintg minutas sessour ò Panadoz fatg cun en ulteriour colp liber igl 2:0. Siva da chel on igls giasts betg ple fatg tant pigl gi e las miglras schanzas da marcar igl amprem gol ed igl pari per igls Indigens on gia Beat Sonder e Richard Kloter.

 

Mengia pac muvimaint

Er siva dalla pôssa pareva igl CB Surses scu blocco. Tiers tgi singuls giuieders on gudagnea l’egn u l’oter cumbat persunal, davigl darar en giuieder tgi fiss sto liber. Mantgea ò simplamaintg igl muvimaint aint igl gi e gist per chel ò igl CB Surses fatg bler mengia pac. Panadoz dantant ò giuia concentro e siva 60 minutas fatg igl 3:0. Igls indigens persiva on darar gia ena schanza ed alla fegn finala gia d’esser cuntaints da betg cassar anc daples gols. En gol ò Panadoz tuttegna anc marco e chegl ainten la 92. minuta. Dumengia proxima gioia igl CB Surses orsoura cunter igl magnatbella Trun/Rabius e cò spetga Urs Keller ena reacziun digl sies team.