Surses-Celerina 2:3 (0:1)

 

Sen fundamaint dalla buna prestaziun ainten la sagonda mesadad vess igl CB Surses mirito aglmanc en pari, schi betg la victorgia. En gol è sto pi bel tgi l’oter.

 

DA GION NUTEGN STGIER

 

Plazza d’Ava, Tinizong, 60 fans.

 

CBS: Beat Wasescha, Philipp Berri, Giatgen Poltera, Fadri Demarmels, Sascha Janutin, Moreno Guetg, Curdin Baltermia, Manuel Mareischen, Linard Sonder, Diego Demarmels, Gabriel Durisch.

 

Reserva: Paulo Ildefonso, Beat Sonder, Giatgen Mitgel Bellini.

 

Igl CBS sainza: Dario Kolb, Richard Kloter e Dario Albertin.

 

Igl aton passo veva igl CB Surses tgappo ena schlaffada da 7:0 orsoura cunter Celerina. Igl è pero savens uscheia tgi igls Engiadines èn considerablamaintg pi ferms ainten la runda d’aton tgi ainten la runda da premaveira. Igl muteiv è tgi da premaveira mantga a Celerina igl trenadi sen igl plaz cun esser chel cuvert anc dei cun neiv. Igls giuieders digl CB Surses savevan da chella «debelezza» da Celerina. Cun chegl era igl CB Surses pront per la revanscha aint igl derbi dallas dus equipas vaschignas.

 

Deblas ampremas 45 minutas

En grond gi on igls numerous fans batg vasia l’amprema mesadad. Ins ò gia l’impressiun tgi nigna equipa vess basigns da far puncts e da gudagner. Igl CB Surses, ò bagn gia daple digl gi e tuttegna betg gia ena schanza concreta. La miglra ò gia siva tschintg minutas Diego Demarmels. Set minutas sessour ò Celerina attatgea sur l’ala dretga e siva d’ena belezza flanca ainten la zona da castei, concludia l’acziun cugl 1:0. Igls indigens on dalunga reagea e la pi gronda pussebladad da far igl pari ò gia siva 30 minutas Gabriel Durisch. Cun neir Beat Sonder aint igl gi è alloura marscho daple ainten la zona da castei digl adversari. Curt avant la fegn dallas ampremas 45 minutas ò Beat Wasescha tignia cun ena parada grondiousa en colp liber da 22 m ed evito igl 2:0 per igls Engiadines.

 

An curt taimp dus gols

Er siva dalla pôssa è Celerina sto privlous e sagetto adegna puspe sen igl gol digl CB Surses. Surtot igls colps libers ed igls corners on adegna puspe procuro per prievel ainten la zona da castei digl team indigen. Igl 1:1 antras Paulo Ildefonso, siva 48 minutas ò sulet valia la pagna da vaseir chel derbi. Gist schi bel è sto igl 2:1 pigl CB Surses e fatg chel gol ò Diego Demarmels. Igl è sto ena cumbinaziun da Manuel Mareischen e da Beat Sonder, cun la conclusiun digl gol d’avantatg per l’equipa da tgesa. Angal tschintg minutas siva on igls giasts marco igl 2:2. En colp liber da Celerina ò Philipp Berri palo aint igl agen gol. Siva da chel on igls Engiadines anc gia ulteriouras schanzas da far en gol. Cun bunas paradas ò Beat Wasescha betg laschea tiers igl avantatg per l’equipa dall’otra vart digl Gelgia. Diesch minutas avant la fegn ò igl arbiter do en penalti giustifitgia cunter igl CB Surses. Curdin Baltermia ò taro disfurtino en attatgeder ainten la zona da castei ed igl arbiter ò gia nigna otra schelta tgi da tschivlar igl penalti. Celerina ò fatg nigns regals agl CB Surses e marco igl gol da victorgia. Agls indigens è betg ple reuschai da far igl pari tgi fiss ple tgi sto giustifitgia.